जळगाव प्रतिनिधी । तालुक्यातील नंदगाव-फेसर्डी ग्रुप ग्रामपंचायतीला सहा महिने उलटल्यानंतरही ग्रामसेवक मिळत नसल्याने सरपंचासह ग्रामस्थांकडून सोमवारी १४ मार्च रोजी सकाळी ११ वाजता जळगाव पंचायत समिती कार्यालयासमोर ठिय्या आंदोलन पुकारण्यात आले आहे.
याबाबत माहिती अशी की, जळगाव तालुक्यातील नंदगाव-फेसर्डी ग्रुप ग्रामपंचायतीला सहा महिने उलटल्यानंतरही ग्रामसेवक मिळालेला नाही. त्यामुळे विविध विकास कामांसह जन्म दाखला, मृत्यू दाखला, उतारे व विविध घरकुल योजनांची कामे रखडली आहेत. ग्रामसेवक मिळावा यासाठी पंचायत समिती कार्यालयाकडे वारंवार पाठपुरावा करण्यात आला. मात्र, ग्राम विस्तार अधिकारी हे ग्रामसेवक नियुक्त केला आहे, असे सांगून वेळ मारून नेत आहेत. गेल्या ४ वर्षांपासून ग्रामपंचायतीचे दप्तर ऑडिटच्या नावाखाली जप्त करण्यात आले आहे. नांदगाव-फेसर्डी ग्रुप ग्रामपंचायतीला जाणीवपूर्वक विकास कामांपासून वंचित ठेवले जात असल्याचा आरोप सरपंच भूषण पवार यांनी यावेळी केला.
