जळगाव : प्रतिनिधी
पत्नी आणि मुलगा कामावर असताना विलास रूपचंद इंगळे (वय ५५, रा. वाल्मीक नगर) यांनी राहत्या घरात गळफास घेत आत्महत्या केल्याची घटना बुधवारी सायंकाळी पाच वाजेच्या सुमारास उघडकीस आली. आत्महत्येचे कारण अस्पष्ट असून याप्रकरणी शनिपेठ पोलिस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, विलास इंगळे हे सेंट्रिंग काम करून कुटुंबाचा उदनिर्वाह करीत होते. बुधवारी नेहमीप्रमाणे त्यांची पत्नी स्वयंपाकाच्या कामाला गेल्या होत्या, तर मुलगा रिक्षामध्ये प्रवाशांना सोडण्यासाठी गेला होता. त्यामुळे इंगळे हे घरी एकटेच होते. विलास इंगळे यांनी घराचा दरवाजा आतून बंद करून गळफास घेत जीवनयात्रा संपविली. ही घटना परिसरात राहणाऱ्या नागरिकांच्या लक्षात येताच, त्यांनी इंगळे यांच्या मुलाला माहिती दिली. त्याने घराकडे धाव घेतली असता वडील गळफास घेतलेल्या अवस्थेत दिसून आले. परिसरातील नागरिकांच्या मदतीने इंगळे यांना शासकीय वैद्यकीय महाविद्यालय व रुग्णालयात आणले असता वैद्यकीय अधिकाऱ्यांनी मयत घोषित केले. त्यांच्या पश्चात पत्नी, मुलगा व तीन मुली असा परिवार आहे.
