यावल : प्रतिनिधी
तालुक्यातील पिळोदा खुर्द येथे कर्जामुळे हताश झालेल्या हिरालाल पंढरीनाथ सोनवणे (३७) शेतकऱ्याने या आत्महत्या केली. ही घटना मंगळवारी येथे घडली.
सविस्तर वृत्त असे कि, हिरालाल सोनवणे हे पिलोदा येथे आई, भाऊ, पत्नी, दोन मुलांसह राहात होते. शेती करून परिवाराचा उदरनिर्वाह करत होते. यंदा त्यांनी शेतीसाठी बँकेकडून कर्ज घेतले होते. तसेच गावातदेखील काही जणांकडून उसनवारीने रक्कम घेतली होती.
डोक्यावर कर्जाचा बोजा असताना शेतात टाकलेल्या पिकांचे निसर्गाच्या लहरीपणामुळे नुकसान झाले होते. यामुळे उत्पन्न चांगले आले नाही. याशिवाय शेतमालाला भावही मिळत नसल्याने कर्ज कसे फेडायचे, या चिंतेत ते होते. या विवंचनेतून त्यांनी रविवार, २६ रोजी कीटकनाशक पिले. विष घेतल्याचा प्रकार कुटुंबीयांच्या लक्षात आल्यानंतर हिरालाल यांना लागलीच जळगाव येथे उपचारासाठी आणण्यात आले. दोन दिवसांपासून उपचार सुरू असताना मंगळवारी पहाटे त्यांचा मृत्यू झाला. याप्रकरणी यावल पोलिस ठाण्यात अकस्मात मृत्यूची नोंद करण्यात आली.
