यावल : प्रतिनिधी
तालुक्यातील सावखेडा रस्त्यावर चुंचाळे गावाच्या शिवारात दुचाकी घसरून अपघात घडला होता. यामध्ये पिता, पुत्र जखमी झाले होते. यातील जखमी झालेल्या १० वर्षीय बालकाची तीन दिवस दिलेली मृत्यूशी झुंज अखेर बुधवारी संपली.
मिळालेल्या माहितीनुसार, दुचाकी घसरून राकेश भरतसिंग बारेला (३०) आणि व त्याचा मुलगा युसुफ बारेला (१०) हे पिता, पुत्र जखमी झाल्याची घटना रविवार, २६ रोजी जानेवारी घडली होती. सावखेडा ते गायरान या रस्त्यावर चुंचाळे गावाच्या शिवारात मोटरसायकल घसरून राकेश बारेला व युसुफ बारेला हे दोघे गंभीर जखमी झाले होते. जखमी अवस्थेत त्यांना यावल ग्रामीण रुग्णालयामध्ये आणण्यात आले. यावल ग्रामीण रुग्णालयात त्यांच्यावर प्रथमोपचार करण्यात आले. बालकाची प्रकृती गंभीर असल्याने त्याला जळगाव जिल्हा शासकीय वैद्यकीय महाविद्यालयाच्या रुग्णालयात हलवण्यात आले होते. जळगाव रुग्णालयात उपचारादरम्यान या १० वर्षीय बालक युसुफ याचा मृत्यू झाला. याप्रकरणी यावल पोलिस ठाण्यास पोलिस हवलदार सुनील पाटील यांच्या फिर्यादीवरून राकेश बारेला याच्याविरुद्ध अपघाताचा गुन्हा दाखल करण्यात आला आहे. पोलिस उपनिरीक्षक पाराजी वाघमोडे करीत आहेत.
