जळगाव : प्रतिनिधी
जळगाव जिल्हा मराठा विद्या प्रसारक सहकारी समाज मर्यादित या शैक्षणिक संस्थेच्या कार्यालयात घुसून मारहाण, कागदपत्रे चोरीप्रकरणी दाखल गुन्ह्यात अॅड. विजय भास्कर पाटील, अॅड. प्रवीण चव्हाण यांच्यासह चारही जणांविरुद्ध संघटित गुन्हेगारीचे वाढीव कलम लावण्यात आले आहे. तशी कागदपत्रे सरकार पक्षातर्फे मंगळवारी (२८ जानेवारी) न्यायालयात सादर करण्यात आली.
जळगाव जिल्हा मराठा विद्या प्रसारक सहकारी समाज मर्यादित या शैक्षणिक संस्थेचे मानद सचिव नीलेश भोईटे यांनी १५ डिसेंबर रोजी जिल्हा पेठ पोलिस ठाण्यात फिर्याद दिली. त्यावरून अॅड. विजय भास्कर पाटील, त्यांचे भाऊ संजय भास्कर पाटील, अॅड. प्रवीण चव्हाण, कवयित्री बहिणाबाई चौधरी उत्तर महाराष्ट्र विद्यापीठाचे कुलसचिव विनोद पाटील यांच्याविरुद्ध गुन्हा दाखल करण्यात आला. त्यात अॅड. विजय पाटील यांना जामीन मिळालेला आहे. तर उर्वरित तीन जणांनी अटकपूर्व जामीनसाठी वेगवेगळे अर्ज दाखल केले आहे. त्यावर बचाव पक्ष व सरकार पक्षाचा युक्तिवाद झाला आहे.
