अमळनेर : प्रतिनिधी
अज्ञात वाहनाने धडक दिल्याने गर्भवती नील गायीचा मृत्यू झाल्याची घटना २७ रोजी पहाटे सहा वाजेच्या सुमारास तालुक्यातील जानवे गावाजवळ घडली. हा अपघात होताच वनकर्मचाऱ्यांना शेतकऱ्यांनी माहिती दिली. मात्र नीलगाय सापडली नाही. पुन्हा दुसऱ्या दिवशी सकाळी आठ वाजेच्या सुमारास एका शेतकऱ्याने जखमी नीलगायीची माहिती दिल्यावर वन कर्मचाऱ्यांनी नीलगायीचा शोध घेतला.
घटनास्थळी एका चारचाकीचे काच पडलेले होते आणि ३० फुटाच्या अंतरावर जखमी अवस्थेत नीलगाय आढळून आली. तत्काळ वनरक्षक रामदास वेलसे, जानव्याचे पशुवैद्यकीय अधिकारी थोरात यांनी भेट देऊन गाईवर उपचार केले. नीलगायीचे पुढचे पाय तुटलेले होते. तेथून नीलगायीला अमळनेर येथे पशुवैद्यकीय रुग्णालयात आणण्यात आले. पशुवैद्यकीय अधिकारी डॉ. रवींद्र गाढे यांनी प्रथमोपचार केले, मात्र तोपर्यंत गायीचा मृत्यू झाला होता. गाय गर्भवती असल्याचे डॉ. गाढे यांनी सांगितले. वनरक्षक रामदास वेलसे यांनी नीलगायीवर जानव्याच्या जंगलात अंत्यसंस्कार केले.
