जळगाव : प्रतिनिधी
शहरातील दुध फेडरेशन रोडवर सकाळी १० वाजेच्या सुमारास भीषण अपघातात एक तरुण ठार झाल्याची घटना घडल्यानंतर त्याच रस्त्यावर रात्री ९ वाजता पुन्हा भरधाव दुचाकीने जोरदार धडक दिल्यामुळे सिकंदर दिलावर पठाण (५६, रा. राजीव गांधी नगर) हे ठार झाले. हा अपघात शनिवारी (२५ जानेवारी) रात्री साडेनऊ वाजेच्या सुमारास दूध फेडरेशन रस्त्यावर झाला.
मिळालेल्या माहितीनुसार, सुरत रेल्वे गेटकडून शिवाजीनगर उड्डाणपूलाकडे दोन दुचाकीस्वार “रेस” लावून जात होते, अशी माहिती प्रत्यक्षदर्शीनी दिली. या रेसमुळे हा अपघात झाला. सिकंदर पठाण हे पायी जात असताना त्यांना धडक दिल्यानंतर दुचाकीस्वार काही अंतरावर उभ्या असलेल्या रिक्षाला धडकला. सुदैवाने त्या ठिकाणी प्रवासी महिला बचावली. शनिवारी सकाळी डंपरणे ट्रॅक्टरला धडक दिल्याची घटना घडल्यानंतर अवघ्या १२ तासात हा दुसरा अपघात होऊन आणखी एकाचा बळी गेला आहे.
