जळगाव : प्रतिनिधी
तालुक्यातील नांद्रा खुर्द येथून मन हेलावून टाकणारी घटना घडलीय. घरासमोर सुरू असलेल्या शेकोडीत आठ महिन्याचा चिमुकला पडून गंभीर भाजला गेला. या चिमुकल्यावर जिल्हा शासकीय वैद्यकीय महाविद्यालयात उपचार सुरू असतांना सोमवारी २० जानेवारी रोजी पहाटे ५ वाजता मृत्यू झाला आहे. या घटनेमुळे कुटुंबियांनी मोठा आक्रोश केला. देवांशु सुनिल सोनवणे (वय ८, रा. नांद्रा खुर्द ता.जि.जळगाव) असे मयत चिमुकल्याचे नाव आहे.
मिळालेल्या माहितीनुसार, जळगाव तालुक्यातील नांद्रा खुर्द गावात सुनिल सोनवणे हे आपल्या परिवारासह वास्तव्याला आहे. ११ जानेवारी रोजी सायंकाळी शेकोटी लावण्यात आलेली होती. त्यावेळी देवांश हा खेळत असतांना तो शेकोटीत पडला. त्यामुळे तो गंभीररित्या भाजला गेला होता. त्याचे वडील सुनिल सोनवणे यांनी तातडीने जळगाव येथील शासकीय वैद्यकीय महाविद्यालयात उपचारार्थ दाखल करण्यात आले.
दरम्यान त्याच्यावर उपचार सुरू असतांना सोमवारी २० जानेवारी रोजी पहाटे ५ वाजता मृत्यू झाला आहे. यावेळी कुटुंबियांनी मोठा आक्रोश केला होता. याप्रकरणी जळगाव तालुका पोलीस ठाण्यात अकस्मात मृत्यूची नोंद करण्यात आली. पुढील तपास पोहेकॉ विलास शिंदे हे करीत आहे.
