यावल प्रतिनिधी । कौटूंबिक कारणावरून संतापाच्या भरात पत्नीच्या डोक्यात लाकडी दांडा मारून खून केल्याची धक्कादायक घटना तालुक्यातील थोरगव्हाण येथे सायंकाळी घडली. खून करणारा संशयित पती हा स्वत:हून यावल पोलीसात जमा झाला आहे. रात्री उशीरापर्यंत पोलीसात गुन्हा नोंदविण्याचे काम सुरू होते.
इंदूबाई प्रकाश पाटील (वय-५८) रा. थोरगव्हाण ता. यावल असे मयत महिलेचे नाव आहे.
पोलीस सुत्रांकडून मिळालेली माहिती अशी की, यावल तालुक्यातील थोरगव्हाण येथील रहिवाशी इंदूबाई पाटील ह्या पती प्रकाश पांडूरंग पाटील (वय-६५), विवाहित मुले आनंद आणि मुकेश यांच्यासह वास्तव्याला आहे. इंदूबाई पाटील आणि प्रकाश पाटील यांच्या गेल्या अनेक दिवसांपासून कौटुंबिक वाद सुरू होता. रविवार २७ फेब्रुवारी रोजी मुलगा आनंद हा जळगाव येथे कामासाठी गेला होता. तर लहान मुलगा एका गल्लीत वेगळा राहतो. त्यामुळे घरात प्रकार पाटील आणि पत्नी इंदूबाई पाटील हे दोन्ही एकटेच होते.सायंकाळी ५ वाजेच्या सुमारास पती पत्नी यांच्या कौटूबिक कारणावरून तीव्र वाद झाला. यात संतापाच्या भरात प्रकाश पाटील यांनी पत्नी इंदूबाई पाटील यांच्या डोक्यात लाकडी दांडका टाकला. यात इंदूबाई पाटील यांच्या डोक्याला गंभीर दुखापत झाली. त्यांना शेजारच्यानी तातडीने जळगाव जिल्हा रूग्णालयात उपचारार्थ नेण्यात असतांना वाटेतच त्यांचा मृत्यू झाला. संशयित आरोपी पती प्रकाश पाटील याने खून केल्यानंतर स्वत:हून यावल पोलीस ठाण्यात जमा झाला आहे.
जिल्हा शासकीय वैद्यकीय महाविद्यालयात मृतदेह आणण्यात आला असून रात्री उशीरापर्यंत संशयित आरोपी पती प्रकाश पांडूरंग पाटील याच्या विरोधात गुन्हा नोंदविण्याचे काम सुरू होते. मयत महिलेच्या पती, दोन मुले आणि विवाहित मुलगी असा परिवार आहे.
