चाळीसगाव : प्रतिनिधी
चाळीसगाव ते छत्रपती संभाजीनगर रस्त्यावरील रांजणगाव फाट्यावर महामार्ग क्रमांक २११वर क्रूझर चारचाकी व दुचाकीच्या झालेल्या अपघातात दुचाकीवरील महिला जागीच ठार झाली. तर ६ जण जखमी झाल्याची घटना १९ जानेवारीला दुपारी १.३० ते २ वाजेदरम्यान घडली.
मिळालेल्या माहितीनुसार, चाळीसगाव तालुक्यातील खेर्डे तांडा येथील कृष्णा संजय जाधव (वय १९) हा दुचाकी (एमएच १९, एएस ८४७३) वर त्याची आजी चंदाबाई मलखान पवार (रा. कोंगानगर, ता. चाळीसगाव) यांना घेवून चाळीसगाव कडे येत होता. तर रांजणगाव फाट्यावर चाळीसगावकडून संभाजीनगर कडे भरधाव वेगाने जाणाऱ्या क्रुझर (एमएच- २०, सीएच- ६५२२) या चारचाकी व दुचाकीची समोरासमोर धडक झाली. या अपघातात दुचाकीवरील चंदाबाई मलखान पवार यांचा जागीच मृत्यू झाल्याची घटना १९ जानेवारीला दुपारी १.३० ते २ वाजेदरम्यान घडली. तर दुचाकी चालक कृष्णा संजय जाधव यासह क्रूझरमधील चालक व प्रवासी असे ५ जण जखमी झाले आहेत. या अपघातात चारचाकी वाहन रस्त्यावरच उलटले होते. दरम्यान, जखमींवर खासगी रुग्णालयात उपचार सुरु आहेत. रात्री उशिरापर्यंत चाळीसगाव ग्रामीण पोलीस ठाण्यात या अपघातप्रकरणी गुन्हा दाखल करण्याची प्रक्रिया सुरु होती
