मुंबई : वृत्तसंस्था
बॉलिवूड अभिनेता सैफ अली खानवर हल्ला होऊन दोन दिवस उलटून गेले तरी हल्लेखोर पोलिसांच्या हाती लागलेला नाही. शनिवारी सकाळी संशयिताचे तिसरे छायाचित्र समोर आले आहे. हे चित्र हल्ल्यापूर्वीचे आहे. यामध्ये तो पिवळ्या शर्टमध्ये दिसत आहे.
याप्रकरणी वांद्रे पोलीस सध्या 2 जणांची चौकशी करत आहेत. या दोघांचे दिसणे सैफवर हल्ला करणाऱ्या सारखेच असल्याचे बोलले जात आहे, ज्याचे फोटो समोर आले आहेत. येथे पोलिसांनी घटनास्थळावरून गोळा केलेले बोटांचे ठसे फॉरेन्सिक लॅबमध्ये पाठवले आहेत. लीलावती रुग्णालयाच्या डॉक्टरांनी सांगितले की, सैफला खासगी वॉर्डात हलवण्यात आले आहे, मात्र तो सध्या जबाब नोंदवण्याच्या स्थितीत नाही. याआधीही संशयिताची दोन छायाचित्रे समोर आली आहेत. सैफच्या अपार्टमेंटच्या पायऱ्यांवर लावण्यात आलेल्या सीसीटीव्हीने पहिले छायाचित्र टिपले होते, ज्यामध्ये तो हल्ल्याच्या रात्री 1:37 वाजता वर चढताना आणि 2:33 वाजता खाली येताना दिसत होता.
यानंतर शुक्रवारी समोर आलेल्या दुसऱ्या छायाचित्रात संशयित बदललेल्या अवस्थेत दिसत होता. हे छायाचित्र वांद्रे येथील लकी हॉटेलजवळचे असल्याचे सांगण्यात येत आहे. मीडिया रिपोर्ट्सनुसार, तिन्ही छायाचित्रे हल्लेखोराची आहेत. मात्र, पोलिसांनी अद्याप याला अधिकृत दुजोरा दिलेला नाही.
