मुक्ताईनगर प्रतिनिधी । जळगाव जिल्ह्यात सलग दुसऱ्या दिवशी लाचलुचपत प्रतिबंधक विभागाच्या कारवाईमुळे महसूल विभागात खळबळ उडाली आहे. कालच जळगाव तालुक्यातील कुसुंबा येथील तलाठ्याला ३ हजार रुपयांची लाच घेताना अटक करण्यात आली होती. आज, मुक्ताईनगर तालुक्यातील काकोडा येथे ५ हजार रुपयांची लाच घेताना तलाठी आणि त्याच्या दोन खाजगी साथीदारांना रंगेहात पकडण्यात आले आहे.
लाचेची मागणी:
तक्रारदार हे जळगाव शहरातील रहिवासी असून, त्यांचे मूळ गाव कुऱ्हा (ता. मुक्ताईनगर) आहे. 1997 मध्ये त्यांच्या आजोबांच्या निधनानंतर त्यांच्या वडील, काका, आत्या आणि इतर नातेवाईकांची नावे 7/12 उताऱ्यावर नोंदवण्यात आलेली नव्हती. या कामासाठी तलाठी प्रशांत प्रल्हाद ढमाळे (वय-42, रा. चिखली, ता. मलकापूर, जि. बुलढाणा) यांनी शासकीय शुल्क भरण्याऐवजी पाच हजार रुपयांची लाच मागितली. तक्रारदाराने लाचलुचपत विभागाशी संपर्क साधून तक्रार दाखल केली.
सापळा आणि कारवाई:
८ जानेवारी रोजी, लाचलुचपत विभागाच्या पथकाने सापळा रचून तलाठी ढमाळे यांना लाच स्वीकारताना पकडले. यासोबतच त्यांच्या दोन खाजगी साथीदार अरुण शालिग्राम भोलानकार (वय-32) आणि संतोष प्रकाश उबरकर (वय-25, दोन्ही रा. कुऱ्हा, ता. मुक्ताईनगर) यांनाही अटक करण्यात आली.
गुन्हा दाखल:
या तिघांविरुद्ध मुक्ताईनगर पोलीस ठाण्यात गुन्हा दाखल करण्याची प्रक्रिया सुरू असून, या कारवाईमुळे महसूल विभागात खळबळ माजली आहे.
पुन्हा लाचखोर तलाठी पकडला; ५ हजारांच्या लाचेचे त्रिकुट जाळ्यात
