धरणगाव प्रतिनिधी । शहरातील दोन बालिकांवर झालेल्या अत्याचाराचा निषेध करण्यासाठी आज शहरातून भव्य मूक मोर्चा काढण्यात आला.
मोर्चानंतर प्रशासनाला निवेदन दिल्यानंतर झालेल्या सभेत मान्यवर महिलांनी संतप्त प्रतिक्रिया व्यक्त केल्या. ही घटना शहराच्या लौकीकाला काळीमा फासणारी असून पीडित बालिकांना न्याय न मिळाल्यास आपण रस्त्यावर उतरणार असल्याचा इशारा देण्यात आला आहे. यावेळी शहरातील विविध संघटनांच्या महिला व पदाधिकाऱ्यांनी सहभाग नोंदविला होता.
या घटनेचा निषेध व्यक्त करण्यासह अत्याचार करणा-या नराधमला कडक शासन होण्याच्या मागणीसाठी धरणगाव शहरात मुकमोर्चाचे आयोजन करण्यात आले होते. या निषेध मोर्चात महिलांची लक्षणीय उपस्थिती होती. सकाळी आठ वाजेपासून बालाजी मंदिरापासून या मुकमोर्चाला सुरुवात झाली व छत्रपती शिवाजी महाराज पुतळ्याजवळ समारोप झाला. याप्रसंगी व्यासपीठावर प्रा. कविता महाजन, प्रा. ज्योती जाधव, नाजनिन शेख, उषाताई वाघ, पुष्पाताई महाजन आदींची उपस्थिती होती. हा खटला फास्ट ट्रॅक न्यायालयात चालवावा तसेच प्रसिद्ध विधीज्ञ उज्वल निकम यांची नेमणूक होण्याची मागणी यावेळी करण्यात आली. नायब तहसिलदार लक्ष्मण सातपुते व पोलिस निरीक्षक शंकर शेळके यांना लहान मुलींच्या हस्ते यावेळी निवेदन देण्यात आले.
