जळगाव : प्रतिनिधी
वीज मीटर नादुरुस्त असून गुन्हा दाखल होऊ नये यासाठी एक लाख रुपयांची लाच मागणाऱ्या धनराज वायरम व गोटू वायरमन (पूर्ण नाव समजू शकले नाही) या दोघांना लाचलुचपत प्रतिबंधक विभागाच्या पथकाने ताब्यात घेतले.
मिळालेल्या माहितीनुसार, जळगावातील ३० वर्षीय तक्रारदार यांच्या घरचे पाच वीज मीटर महावितरणच्या भरारी पथकाने काढून नेले व ते नादुरुस्त असल्याचे सांगितले. या प्रकरणात वीजचोरीचा गुन्हा दाखल होऊ द्यायचा नसल्यास एक लाख ५० रुपयांची मागणी केली. यात तडजोडीअंती एक लाख रुपये स्वीकारण्याचे दोघांनी मान्य केले. या विषयी तक्रारदाराने लाचलुचपत प्रतिबंधक विभागाकडे तक्रार केली.
पथकाने लाचेच्या मागणीविषयी पंचांसमक्ष खात्री केली असता एका मीटरसाठी ३० हजार रुपये याप्रमाणे एकूण एक लाख ५० हजार रुपये मागितले. मात्र, एक लाख रुपयांमध्ये तडजोड झाल्याचे समोर आले. त्यानुसार पथकाने धनराज वायरमन आणि गोटू वायरमन या दोघांना मंगळवारी (३१ डिसेंबर) ताब्यात घेतले.
