धरणगाव : प्रतिनिधी
तालुक्यातील पाळधी येथे किरकोळ कारणावरुन मंगळवारी रात्री ११ वाजेच्या सुमारास वाद झाला. त्यातून कारचालकाला मारहाण करुन कारची तोडफोड करण्यात आली. यामुळे संतप्त जमावाने चार ते पाच दुकानांची जाळपोळ केली. घटनेची तीव्रता पाहून जळगावातून पोलिसांची अतिरिक्त कुमक मागवण्यात आली होती. एका भागात दगडफेकीचा प्रकार घडला.
या प्रकरणी एकास ताब्यात घेण्यात आल्याची माहिती धरणगावचे पोलिस निरीक्षक पवन देसले यांनी दिली. दरम्यान, वादात जमावाने काही दुकाने फोडून त्यातील साहित्यांची नासधूस केली. रात्री १२ वाजेच्या सुमारास पोलिस अधीक्षक महेश्वर रेड्डी यांनी पाळधीत भेट देवून अधिकाऱ्यांना सूचना दिल्या. एकीकडे नवीन वर्षाचा जल्लोष होत असताना दुसरीकडे पाळधीत झालेल्या वादाने तणावाची परिस्थिती निर्माण झाली आहे. गावात संचारबंदी सदृश्य परिस्थिती असून वादाचे कारण रात्री उशिरापर्यंत कळू शकले नव्हते.
