जालना : वृत्तसंस्था
राज्यातील जालना शहरातून एक धक्कादायक घटना उघडकीस आली आहे. क्रिकेट खेळताना एका 32 वर्षीय खेळाडूचा मृत्यू झाला आहे. या तरुणाला हृदयविकाराचा झटका आल्याने त्याला प्राण गमवावे लागले असल्याचे समजते. आपल्या सहकारी फलंदाजाशी बोलून थोडे पुढे गेल्यावर तरुणाला अचानक हृदयविकाराचा झटका आला आणि थेट जमिनीवर कोसळला. यावेळी मदतीसाठी इतर खेळाडू धावले, मात्र त्यांचे प्रयत्न अयशस्वी ठरले आणि तरुणाचा मृत्यू झाला.
जालना येथे क्रिकेट स्पर्धेचे आयोजन करण्यात आले होते. यावेळी स्पर्धा सुरू असताना विजय पटेल हा फलंदाजी करण्यासाठी मैदानात उतरला होता. सामान्यादरम्यान त्याने आपल्या सहकारी फलंदाजाशी संवाद साधला त्यानंतर विजय पटेल फलंदाजी करण्यासाठी परतत असतानाच त्याला अचानक हृदयविकाराचा झटका आला आणि ग्राउंडवर कोसळला. यानंतर तातडीने इतर खेळाडू त्याच्या मदतीसाठी धावले व रुग्णालयात दाखल केले. मात्र, डॉक्टरांनी त्याला तपासून मृत घोषित केले. अचानक घडलेल्या या घटनेने सर्वांनाच धक्का बसला.
या घटनेविषयी बोलताना विजय पटेल याच्या सहकारी मित्राने सांगितले की, अचानक खेळता खेळता विजय खाली पडल्याचे आम्हाला दिसले. त्यानंतर आम्ही त्याला रुग्णालयात घेऊन गेलो, पण हृदयविकाराचा झटका आल्याने त्याचा मृत्यू झाल्याचे रुग्णालयात सांगण्यात आले, अशी माहिती सहकारी मित्राने दिली आहे.
जालना येथील फ्रेजर बॉइज मैदानावर ख्रिसमस निमित्त क्रिकेट स्पर्धेचे सामने सुरू होते. या स्पर्धेतील एका सामन्यात हा प्रकार घडला आहे. यामुळे सर्वांनाच मोठा धक्का बसला आहे. दरम्यान, सध्याच्या जीवनशैलीत तरुणांना विशेषतः वयाच्या 30-32 या वयात हृदयविकाराचे झटके येण्याचे प्रमाण वाढले असल्याचे दिसत आहे. त्यामुळे जीवनशैली चांगली ठेवण्याकडे अधिक लक्ष देण्याची गरज असल्याचे पुन्हा अधोरेखित होत आहे.
