जळगाव : प्रतिनिधी
शहरातील कालिंका माता चौकात बुधवारी सायंकाळी सात वाजता भरधाव डंपरच्या धडकेत मुलाचा मृत्यू झाला होता. संतप्त जमावाने डंपर पेटवून, महामार्ग बंद केला होता. यासह शासकीय कामात अडथळा निर्माण केल्याप्रकरणी गुरुवारी रात्री ११ वाजता एमआयडीसी पोलिस ठाण्यात अज्ञात १०० ते १५० जणांविरोधात गुन्हा दाखल करण्यात आला आहे.
शासकीय नियमांचे उल्लंघन केल्याप्रकरणी जखमी झालेले पोलिस कॉन्स्टेबल राहुल घेटे यांनी दिलेल्या फिर्यादीवरून गुरुवारी रात्री ११ वाजता जमावातील शंभर ते दीडशे अनोळखी व्यक्तींविरोधात एमआयडीसी पोलिस ठाण्यात गुन्हा दाखल करण्यात आला आहे. पुढील तपास सहायक पोलिस निरीक्षक गणेश वाघ हे करीत आहेत.
जळगाव शहरातील कालिंका माता चौकामध्ये चालक शुभम विश्वनाथ भोलाणे याने बुधवारी भरधाव डंपर चालवून योजस धीरज बहाटे या चिमुकल्याला चिरडले होते. यावेळी संतप्त नागरिकांनी आंदोलन करून, डंपर पेटवून दिला होता. तसेच पोलिसांना धक्काबुक्की केल्याचा प्रकार घडला होता. जमावातील काही तरुणांनी मोठमोठ्याने आरडाओरड करत पोलिस अधिकारी आणि पोलिस कर्मचारी यांच्या शासकीय बंदोबस्तात अडथळा निर्माण केला. तसेच काहीजणांनी डंपर पेटवून दिले.
