जामनेर : प्रतिनिधी
तालुक्यातील तोंडापूर-वाकोद रस्त्यावरील तोंडापूरपासून चार किलोमीटर अंतरावर भारुडखेडे गावाजवळ रस्त्याच्या कडेला बिबट्या मादी गुरुवारी सकाळी ७ वाजेच्या सुमारास मृतावस्थेत सापडली.
मिळालेल्या माहितीनुसार, तोंडापूर-भारुडखेडे रस्त्यावर सदाभाऊ रामभाऊ मोकासरे यांच्या शेताच्या बंधाऱ्यात ती पडून होती. ही घटना वाऱ्यासारखी गावात पसरताच मोठी गर्दी जमली. वनविभागाच्या अधिकाऱ्यांना माहिती मिळताच तेही घटनास्थळी हजर झाले. पंचनामा करून मृत मादी बिबट्याला जामनेर येथे शवविच्छेदनासाठी नेण्यात आले.
पशुवैद्यकीय अधिकारी संजय खाचणे व त्यांच्या टीममार्फत शवविच्छेदन करण्यात आले. मृत बिबट्याचे वय ३ वर्षे असून, तो बिबट्या विद्युत तारेच्या प्रवाहाच्या धक्क्याने मृत झाल्याचा प्राथमिक अंदाज पशुवैद्यकीय अधिकाऱ्यांनी व्यक्त केला. बिबट्याचे सर्व अवयव शाबूत असल्याचेही निदर्शनास आले. या घटनेप्रकरणी अज्ञात व्यक्तीविरुद्ध गुन्हा दाखल करण्यात आला असून, पुढील तपास वनविभाग, जळगाव यांच्यामार्फत सुरू आहे.
यावेळी वनविभागाचे वनसंरक्षण अधिकारी (जळगाव) उमेश बिराजदार, मानद वन्यजीव अधिकारी रवींद्र फालक, वनपरिक्षेत्र अधिकारी (जामनेर) सचिन जाधव, गोद्री येथील वनपाल समाधान धनवट, जामनेर येथील वनपाल प्रशांत पाटील, वनरक्षक मोनिका कांबळे, मंगेश निकुंभ, कुणाल जाधव यांनी मृत बिबट्यावर अंत्यसंस्कार केले.
