एरंडोल : प्रतिनिधी
शहरातील एरंडोल येथील महादेव मंदिर परिसरात गुरुवारी दुपारी तीन वाजेच्या सुमारास तिसऱ्या मजल्यावरील घरात गळफास घेऊन महिलेने आपल्या नऊ वर्षीय मुलीसह आत्महत्या केल्याची हृदयद्रावक घटना उघडकीस आली. आत्महत्येचे कारण स्पष्ट झालेले नाही.
मिळालेल्या माहितीनुसार, सपना प्रकाश माळी (३३) आणि केतकी माळी (९) अशी या मृत माय- लेकींची नावे आहेत. घटनास्थळी गादीवर वही आढळून आली आहे. त्यात सपना हिने आपल्या आत्महत्येस कोणीही जबाबदार नाही, असा उल्लेख केला आहे. एरंडोल येथे जहांगीरपुरा भागातील महादेव मंदिर परिसरात सपना माळी ही माहेरी राहत होती. आठ वर्षांपूर्वी तिचा घटस्फोट झाला होता. गुरुवारी दुपारी तिसऱ्या मजल्यावरील खोलीचा दरवाजा आतून लावलेला होता.
सपना हिचा भाऊ राहुल हा घरी आला असता त्याला त्याची बहीण व भाची घरी दिसले नाहीत. त्याने तिसऱ्या मजल्यावर जाऊन बघितले असता खोलीचा दरवाजा आतून लावलेला होता. त्याने बहिणीला आवाज दिला असता काही एक उत्तर मिळाले नाही. शेवटी दरवाजा तोडण्यात आला. त्यावेळी सपना व केतकी या दोघी गळफास घेतलेल्या स्थितीत आढळून आल्या. त्यावेळी राहुलने एकच हंबरडा फोडला. याबाबत एरंडोल पोलिसात अकस्मात मृत्यूची नोंद करण्यात आली आहे
