जळगाव : प्रतिनिधी
भरधाव बसने ट्रकला मागील बाजूने धडक दिल्यामुळे ट्रक रस्त्याच्या कडेला उलटला. यामध्ये ट्रकमधील अनिल समाधान पाटील हे जखमी झाले. हा अपघात १६ डिसेंबर रोजी रात्री महामार्गावर पोदार शाळेजवळ झाला. याप्रकरणी बसचालकाविरुद्ध तालुका पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, ट्रकचालक मिलिंद अशोक सोनवणे २८, रा. बांभोरी प्र.चा., ता. धरणगाव) हे त्यांचा ट्रक (क्र. एमएच १९, सीवाय ६५५६) बांभोरीकडून जळगावकडे घेऊन येत होते. त्यावेळी जळगावकडून बांभोरीकडे जाणाऱ्या बसचा चालक आनंदा दामू माळी (रा विदगाव) याने दारूच्या नशेत बस (क्र. एमएच १४, बीटी २३०४) भरधाव चालवत ट्रकला जोरदार धडक दिली. त्यामुळे ट्रक उलटली व ट्रकमधील अनिल पाटील हे जखमी झाले. यामध्ये बसचेही नुकसान झाले आहे. याप्रकरणी ट्रकचालक मिलिंद सोनवणे यांनी तालुका पोलिस ठाण्यात फिर्याद दिली. त्यावरून बसचालक आनंदा माळी याच्याविरुद्ध गुन्हा दाखल करण्यात आला आहे.
