अमळनेर : प्रतिनिधी
राज्यातील जनतेने महायुतीला मोठे यश दिल्यानंतर महायुती सरकारचा मंत्री मंडळ विस्तार झाला आहे तर जळगाव जिल्ह्याला यंदाच्या मंत्रीमंडळात देखील तीन मंत्री पद दिले असून यात अजित पवार गटाचे एकमेव आमदार व माजी मंत्री अनिल पाटील यांना डच्चू दिला आहे. यावर आता आ.अनिल पाटील यांनी मौन सोडत आपल्या भावना व्यक्त केल्या आहे.
मंत्रिपद मिळालेले नसले तरी माझ्या कामकाजात फरक पडणार नाही. प्रामाणिकपणे आणि आनंदाने काम करत राहणार आहे. जनसेवेसाठी मंत्रिपद मिळेल, अशी अपेक्षा होती. मात्र पक्षश्रेष्ठींनी जो निर्णय घेतला त्यावर आपली कोणतीही नाराजी नाही, अशा शब्दांत माजीमंत्री तथा आ. अनिल पाटील यांनी आपल्या भावना व्यक्त केल्या.
ते म्हणाले की, मदत व पुनर्वसन खात्याचा मंत्री असताना शेतकऱ्यांच्या खात्यावर डीबीटीद्वारे नुकसानभरपाईचे पैसे कसे पडतील आणि शेतकरी बांधवांना न्याय कसा देता येईल, याचा प्रामाणिक प्रयत्न केला. त्यामुळे साहजिकच मंत्रिपद मिळेल, अशी अपेक्षा होती. परंतु पक्षश्रेष्ठींनी सामाजिक समतोल राखण्यासाठी आणि काही वरिष्ठ आमदार असतील, त्यांना न्याय देण्यासाठी मला थांबविण्याचा निर्णय घेतला असेल. याठिकाणी विकासाचे सुरू असलेले पर्व थांबणार नाही.
