जळगाव : प्रतिनिधी
भरधाव वाहनाने धडक दिल्यामुळे पायी जात असलेल्या रामचंद्र धनू माळी (५७, रा. रामेश्वर कॉलनी) हे ठार झाले. हा अपघात १३ रोजी राष्ट्रीय महामार्गावर एक नर्सरीजवळ झाला. याप्रकरणी एमआयडीसी पोलिस ठाण्यात धडक देणाऱ्या वाहनचालकाविरुद्ध गुन्हा दाखल करण्यात आला आहे.
मिळालेल्या माहितीनुसार, रामेश्वर कॉलनीतील शांतीनारायण नगरात राहणारे रामचंद्र माळी हे १३ डिसेंबर रोजी राष्ट्रीय महामार्गावरून पायी जात होते. यावेळी भरधाव अज्ञात वाहनाने त्यांना जोरदार धडक दिली होती. यामध्ये रामचंद्र माळी हे गंभीर जखमी झाले होते. त्यांच्यावर रुग्णालयात उपचार सुरु असताना त्यांचा मृत्यू झाला. धडक दिल्यानंतर वाहन चालक तेथून पसार झाला. याप्रकरणी गोपाल रामचंद्र माळी यांनी एमआयडीसी पोलिस ठाण्यात फिर्याद दिली. त्यावरून १४ रोजी अज्ञात वाहन चालकाविरुद्ध गुन्हा दाखल करण्यात आला आहे. पुढील तपास पोउनि सचिन नवले करीत आहेत.
