भडगाव प्रतिनिधी । भडगाव येथे भरधाव जाणाऱ्या कारने जोरदार दिलेल्या धडकेत दोन मुलांचा मृत्यू झाला आहे. भडगाव ग्रामीण रुग्णालयासमोर हा अपघात घडला असून चालक कार सोडून पसार झाला आहे. याप्रकरणी भडगाव पोलीस ठाण्यात गुन्हा दाखल करण्यात आला आहे.
अमोल दिपक सोनवणे (वय १५ रा. यशवंत नगर, भडगाव ) व त्याचा मित्र पंकज भारत भोई (रा. भोईवाडा, भडगाव ) अशी मृत मुलांची नावे आहेत.
याबाबत माहिती अशी की, भडगावच्या यशवंतनगर भागात दीपक वसंत सोनवणे (वय ४६) हे वास्तव्यास आहे. त्यांची मोटार सायकल क्र. (एम.१९ सीसी ४३७५) ही १५ फेब्रुवारी रोजी पंचर झाली होती. सोनवणे यांचा मुलगा अमोल दिपक सोनवणे व त्याचा मित्र पंकज भारत भोई भडगाव असे दोघं जण मोटार सायकल ढकलत नेऊन पंचर काढण्यासाठी जात होते. रात्री ८.३० वाजेच्या सुमारास भडगाव ग्रामीण रुग्णालयाच्या अलीकडेस हॉटेल राज पॅलेस जवळ समोरून येणाऱ्या ईको गाडी (क्र. एमएच २७ एसी ६८४३ वरील चालक नाव गाव माहित नाही) याने ढकलत ढकलत घेऊन जात असलेल्या मोटारसायकलीस समोरुन धडक दिली. या धडकेत अमोल जागीच गतप्राण झाला तर जखमी पंकजचा उपचारादरम्यान मृत्यू झाला आहे. याप्रकरणी कार चालकाविरुद्ध गुन्हा दाखल करण्यात आला आहे.
