पारोळा : प्रतिनिधी
तालुक्यातील खेडीढोक येथील १९ वर्षीय तरुण शेतकऱ्याने त्याच्या शेतात विष प्राशन करून आत्महत्या केल्याची घटना शनिवारी रात्री घडली. हितेश विजयसिंग पाटील असे मयत शेतकऱ्याचे नाव आहे.
मिळालेल्या माहितीनुसार, भानुदास पंडित पाटील (४१, खेडीढोक) यांनी याबाबत पारोळा पोलिसात खबर दिली आहे. गावातील महेंद्र मुख्त्यारसिंग पाटील यांनी आपल्याला खबर दिल्याचे पाटील यांनी म्हटले आहे. फिर्यादीनुसार, हितेश विजयसिंग पाटील याने त्याच्या खेडीढोक शिवारातील शेतात विष प्राशन केले आहे.
भानुदास पाटील, महेंद्र पाटील, विशाल पाटील, मंगलसिंग पाटील, शुभम पाटील, गजानन पाटील यांनी हितेश पाटील यास अमळनेर येथे दाखल केले. मात्र त्याची तब्येत खालावल्याने त्याला कुटीर रुग्णालयात घेऊन जाण्याचा सल्ला डॉक्टरांनी दिला. त्यानुसार हितेश याला कुटीर रुग्णालयात दाखल केले असता शनिवारी रात्री ८:३० वाजेच्या सुमारास त्याला मयत घोषित करण्यात आले. याबाबत पारोळा पोलिस ठाण्यात अकस्मात मृत्यूची नोंद करण्यात आली असून तपास हेकॉ. कैलास साळुंखे करीत आहेत. काही दिवसांपूर्वी हितेशच्या वडिलांनी विष प्राशन करून आत्महत्या केली होती.
