लाईव्ह महाराष्ट्र न्यूज : नशिराबाद येथील गायत्री पेपर मिल नावाच्या पुठ्ठा फॅक्टरीतून निघालेला ट्रकच्या कॅबीनला बॅटरीच्या शॉर्टसर्कीटमुळे अचानक आग लागल्याची घटना नशिराबाद टोल नाक्याजवळ सोमवारी १४ फेब्रुवारी रोजी सायंकाळी ७ वाजता घडली. चालकाच्या वेळीच लक्षात आल्याने ट्रक थांबवून कॅबिनमधून दोघांनी उडी घेतल्याने सुदैवाने बचावले आहे.
ट्रकच्या आग लागल्याचे कळताच जवळ असलेल्या टोल नाक्यावरील कर्मचारी आणि नशिराबाद पोलीसांनी धाव घेवून आग विझविण्यात आली आहे.
याबाबत सविस्तर माहिती अशी की, राष्ट्रीय महामार्गावरील नशिराबाद टोल नाका आणि जयभोले हॉटेलदरम्यान असलेल्या गायत्री पेपर मिल नावाची पुठ्ठा फॅक्टरी आहे. धुळे येथून पुठ्ठा घेवून आलेला ट्रक (एमएच १८ एम ९६२) हा सोमवारी १४ फेब्रुवारी रोजी सांयकाळी ७ वाजता गायत्री मिल फॅक्टरीत खाली करण्यात आला. त्यानंतर फॅक्टरीत पुठ्ठा खाली केल्यानंतर ट्रक पुन्हा धुळ्याकडे जाण्यासाठी राष्ट्रीय महामार्गावर लागला. त्याचवेळी ट्रकच्या बॅटरीत शॉर्टसर्कीट झाल्याने चालत्या ट्रकच्या कॅबिनमध्ये आग लागली. त्यावेळी ट्रक कॅबिनमध्ये आग लागल्याचे ट्रक चालक सादीक वाहेद शेख रा. एरंडोल व अश्वद अली बशीद अली सैय्यद यांच्या लक्षात आल्याने त्यांनी जागेवरच ट्रक थांबवून कॅबिनच्या बाहेर उडी घेतली. त्यामुळे दोघे सुदैवाने बचावले आहे. त्यानंतर नशिराबाद टोल नाक्यावर कार्यरत असलेले कर्मचारी आणि नशिराबाद पोलीस ठाण्याचे पोलीस कर्मचारी पोहेकॉ अतुल महाजन, पो.कॉ. विजय अहिरे यांनी तातडीने धाव घेवून आग विझविण्यासाठी मदत केली. यावेळी लागलेल्या आगीत कॅबीनमधील सामान जळून खाक झाले आहे.