यावल : प्रतिनिधी
किनगाव-यावल रस्त्यावर दुचाकी चालकास अडवून दहा हजारांची रोकड व मोबाइल दोन अज्ञात चोरट्यांनी लांबविले होते. ही घटना १६ रोजी घडली होती. या गुन्ह्यातील दोन संशयितांना पोलिसांनी अटक केली आहे. शनिवारी दोघांना यावल न्यायालयात हजर केले असता २ डिसेंबरपर्यंत तीन दिवसांची पोलिस कोठडी सुनावली आहे.
मिळालेल्या माहितीनुसार, भालशिव-पिंप्री ता. यावल येथील सरपंच मोहन एकनाथ सपकाळे व शिवलाल भगवान सपकाळे हे चोपडा येथून १६ नोंव्हेंबर रोजी रात्री यावलकडे येत होते. दरम्यान किनगावजवळ त्यांची दुचाकी अडवून हत्याराचा धाक दाखवून धमकी देत मोबाइल व १० हजारांची रोकड लांबवली होती.
पोलिस उपनिरीक्षक सोपान गोरे परमेश्वर जाधव यांनी तपास चक्रे फिरवित संशयित फरहान शेख फारूख अहेमद (२४) रा. मिर्झानगर इकबाल चौक बुलढाणा, शेख राजिक शेख इसरार (२२) रा. डांगपुरा, यावल या दोघांना अटक केली आहे. शनिवारी यावल न्यायालयात न्या. आर. एस. जगताप यांच्या समोर हजर केले असता दोघांना २ डिसेंबरपर्यंत तीन दिवसांची पोलिस कोठडी सुनावण्यात आली आहे.
