जळगाव प्रतिनिधी । तालुक्यातील दापोरा शिवारातील नाल्यात सुरू असलेल्या गावठी हातभट्टी तालुका पोलीसांनी उद्ध्वस्त करून सुमारे ७० हजाराचे दारू बनविण्याचे रसायन नष्ट केले आहे. तालुका पोलीसात दोन जणांवर गुन्हे दाखल करण्यात आला आहे.
तालुका पोलीसांनी दिलेल्या माहितीनुसार, जळगाव तालुक्यातील दापोरा गावाच्या बाजूला असलेल्या एका नाल्यात काहीजण बेकायदेशीर गावठी हातभट्टी सुरू असल्याची गोपनिय माहिती पोलीस निरीक्षक रामकृष्ण कुंभार यांना मिळाली. पोलीस उपनिरीक्षक गणेश रायकर, पोहेकॉ हरीलाल पाटील, विश्वनाथ गायकवाड, अशोक महाले, तुषार जोशी, संजय भालेराव यांनी असे पथक तयार करून शनिवारी १२ फेब्रुवारी रोजी सायंकाळी ७ वाजेच्या सुमारास तालुका पोलीस ठाण्याच्या पथकाने छापा टाकला. यावेळी संशयित आरोपी अशोक रामदास सोनवणे हा गावठी हातभट्टीची दारू तयार करतांना आढळून आला. जळत्या चुलीवर दारू तयार करण्याचे कच्चे व पक्क रसायन आढळून आले. यावेळी पोलीसांनी ११ ड्रममध्ये असलेले रसायन आणि ६० लिटर तयार गावठी दारू असा एकुण ७० हजार ४०० रूपये किंमतीचा मुद्देमाल नष्ट केला. तसेच त्याच नाल्याच्या बाजूला रविंद्र प्रकाश सोनवणे हा देखील गावठी हातभट्टीची दारू तयार करतांना पोलीसांना आढळून आला. याठिकाणी दारू तयार करण्याचे ८ ड्रममधील कच्चे रसायन नष्ट केले आहे. याप्रकरणी विश्वनाथ गायकवाड यांच्या फिर्यादीवरून संशयित आरोपी अशोक रामदास सोनवणे आणि रविंद प्रकाश सोनवणे यांच्यावर तालुका पोलीस ठाण्यात गुन्हा दाखल करण्यात आला आहे.
