लाईव्ह महाराष्ट्र न्यूज । यावल तालुक्यातील वाढत्या घरफोड्या आणि शेती अवजारांच्या चोरीचे प्रमाणे वाढले आहे. या पार्श्वभूमीवर शुक्रवारी ११ फेब्रुवारी रोजी कोरपावलीचे सरपंच विलास अडकमोल यांनी जिल्हा पोलीस अधिक्षक डॉ. प्रविण मुंढे यांना निवेदन दिले. त्यावर लवकरात तालुक्यात चोरीच्या घटनांवर बंदोबस्त लावणार असल्याचे अश्वासन पोलीस अधिक्षकांनी दिले.
यावल तालुक्यातील अनेक गावात आणि शेतात मागील काही दिवसांपासून घरफोडीचे तसेच शेतातील शेतकऱ्यांची विद्युत केबल चोरीचे प्रमाण अधिक प्रमाणात वाढ झालेली आहे. सातत्याने वाढ होत असलेल्या शेती साहीत्य चोरी व घरफोडीच्या वाढत्या घटनांना थांबविण्यासाठी यावल पोलिसांना रात्रीची गस्त वाढवण्याकामी तसेच चोरट्यांना लगेच तात्काळ चौकशी करून अटक करावी, अशी मागणी शुक्रवार ११ फेब्रुवारी रोजी दुपारी कोरपावली तालुका यावल सरपंच विलास अडकमोल, काँग्रेस रावेर लोकसभा क्षेत्र अध्यक्ष सद्दाम शाह , ग्रामीण काँग्रेस सेवा फाउंडेशनचे जिल्हा अध्यक्ष तथा कोरपावलीचे माजी सरपंच जलील सत्तार पटेल यांनी जिल्हा पोलीस अधीक्षक डॉ. प्रवीण मुंढे यांची भेट घेवून निवेदन दिले.
त्यावर स्थानिक पोलीस प्रशासनाच्या माध्यमातून लवकरात लवकर चौकशीचे आदेश दिले आहे. चोरीच्या घटनांना थांबवुन, तात्काळ चोरट्यांना जेरबंद करण्याचे आदेश पोलीस अधीक्षक डॉ . प्रविण मुंढे यांनी यावल पोलीस ठाण्याचे पोलीस निरीक्षक सुधिर पाटील यांना देण्याचे आश्वासन दिले.
