हैदराबाद । हैदराबाद शहरातील एक घृणास्पद प्रकार समोर आला आहे. याला विकृतीही म्हणता येईल, शहरातील एका भागात भटक्या कुत्र्यावर बलात्कार (Street Dog Rape) केल्याचा धक्कादायक प्रकार सीसीटीव्हीमुळे समोर आला आहे. या घटनेमुळे परिसरात खळबळ उडाली आहे.
प्राणीमात्रांवर भूतदया दाखवणं ही आपली संस्कृती. तहान-भूक लागलेल्या मुक्या जीवांना खाऊ-पिऊ घालण्याचं काम अनेक जण करताना दिसतात. मात्र एका गृहस्थाने या मुक्या प्राण्यालाच आपल्या विकृतीची शिकार केल्याचा संतापजनक प्रकार पाहायला मिळत आहे
इंडियन एक्स्प्रेसमध्ये प्रसिद्ध झालेल्या वृत्तानुसार, ही घटना हैदराबादच्या नल्लाकुंटा पोलीस स्टेशन हद्दीत घडली. या घृणास्पद प्रकाराबद्दल एका प्राणीप्रेमीने त्या व्यक्तीविरुद्ध पोलीस ठाण्यात तक्रार दाखल केली आहे. सीसीटीव्ही व्हिडिओमध्ये आरोपीला रस्त्यावरील कुत्र्यावर बलात्कार करताना प्राणीप्रेमींनी पाहिले होते. त्यानंतर त्यांनी पोलिसांना या घटनेची माहिती दिली.
पोलीस अधिकाऱ्याने सांगितले की, आरोपी त्याच्या पत्नीसोबत त्याच परिसरात राहत असल्याचे तपासात समोर आले. तब्येतीच्या कारणास्तव तो घरी असतो, तर त्याची पत्नी नोकरी करते. ही घटना गेल्या मंगळवारी घडली. आरोपीचा व्हिडीओ सीसीटीव्हीमध्ये कैद झाला असून त्यात तो रस्त्यावरच्या कुत्र्यासोबत अनैसर्गिक संबंध ठेवताना दिसत आहे. रस्त्यावरील कुत्र्यांशी हे कृत्य करणाऱ्या नराधमांपासून महिला आणि मुलीही सुरक्षित नसल्याचे प्राणीप्रेमी सांगतात. अशा लोकांना तुरुंगात टाकावे. त्यांचे बाहेर राहणे धोकादायक आहे, असं त्यांचं म्हणणं आहे.
