यावल : प्रतिनिधी
यावल भुसावळ रस्त्यावर पेट्रोल पंपाजवळ शुक्रवार दि. १८ ऑक्टोबर रोजी एका दाम्पत्याच्या दुचाकीचे टायर फुटून अपघात घडला होता. यात पती जागीच ठार झाला होता तर पत्नी गंभीर जखमी झाली होती. गंभीर जखमी असलेल्या हेमलता जगदीश अत्तरदे यांचा सोमवारी रात्री उपचारादरम्यान मृत्यू झाला. तर मंगळवारी शिरसाड गावात त्यांच्यावर अंत्यसंस्कार करण्यात आले.
मिळालेल्या माहितीनुसार, यावल भुसावळ रस्त्यावर शहराच्या बाहेर पेट्रोल पंपाच्या समोर शुक्रवारी सायंकाळी चार वाजता भुसावळकडून यावलकडे दुचाकी क्रमांक एम. एच.१९, एन. २४३३ द्वारे जगदीश वासुदेव अत्तरदे (वय ५३) व त्यांची पत्नी हेमलता जगदीश अत्तरदे (वय ४५) हे पती-पत्नी येत होते. दरम्यान, पेट्रोल पंपाच्या जवळ त्यांच्या दुचाकीचे पुढील टायर फुटले आणि भरधाव वेगातील दुचाकी थेट रस्त्याच्या कडेला असलेल्या झाडावर जाऊन धडकली.
या अपघातात जगदीश अत्तरदे जागीच ठार झाले होते. तर त्यांची पत्नी हेमलता या गंभीर जखमी होत्या. गंभीर जखमी महिलेवर जळगाव येथे खासगी रुग्णालयात उपचार सुरू होते. तर उपचारादरम्यान सोमवारी रात्री महिलेचा मृत्यू झाला व मंगळवारी शिरसाड गावात शोकाकुल वातावरणात त्यांच्यावर अंत्यसंस्कार करण्यात आले.
