जळगाव : प्रतिनिधी
पत्नी दिवाळीच्या खरेदीसाठी बाजारपेठेत, तर पती सुरज राजेंद्र भामरे (३५, रा. अयोध्यानगर) हे दुकानावर असताना घराच्या दरवाजाचा कडीकोयंडा तोडून चोरट्यांनी ६४ हजार ४५० रुपयांचे सोने चांदीचे दागिने चोरून नेले. ही घटना २६ ऑक्टोबर रोजी संध्याकाळी उघडकीस आली. याप्रकरणी २७ ऑक्टोबर रोजी एमआयडीसी पोलिस ठाण्यात अज्ञात चोरट्याविरुद्ध गुन्हा दाखल करण्यात आला आहे.
मिळालेल्या माहितीनुसार, सुवर्ण व्यावसायिक सुरज भामरे यांचे सराफ बाजार परिसरात सोने चांदीचे दुकान आहे. ते दुकानावर असताना व त्यांच्या पत्नी दिवाळीच्या खरेदीसाठी बाजारपेठेत गेलेल्या असताना घराच्या दरवाजाचा कडीकोयंडा तोडून चोरट्यांनी घरातून ६४ हजार ४५० रुपये किमतीचे सोने – चांदीचे दागिने चोरून नेले. भामरे यांच्या पत्नी संध्याकाळी घरी आल्या त्यावेळी ही घटना लक्षात आली. याप्रकरणी सुरज भामरे यांनी एमआयडीसी पोलिस ठाण्यात फिर्याद दिली.
