जळगाव : प्रतिनिधी
बसमध्ये चढत असताना अंगणवाडी सेविका विजया विजय हिवराळे (४२, रा. धामणगाव, ता. जळगाव) यांच्या गळ्यातील ३० हजार रुपये किमतीचे सोन्याचे मंगळसूत्र व पर्समधील एक हजार रुपये चोरट्यांनी चोरून नेले. ही घटना शनिवारी (२६ ऑक्टोबर) नवीन बसस्थानकात घडली आहे. याप्रकरणी जिल्हापेठ पोलिस ठाण्यात अज्ञात चोरट्याविरुद्ध गुन्हा दाखल करण्यात आला आहे.
मिळालेल्या माहितीनुसार, विजया हिवराळे या जळगावात कामानिमित्त आल्या होत्या. त्यानंतर त्या जळगावातील नवीन बसस्थानक परिसरातून जामनेर जाणाऱ्या बसमध्ये चढत असताना चोरट्याने त्यांच्या गळ्यातील सोन्याचे मंगळसूत्र आणि पर्समधील एक हजार रुपये, असा एकूण ३१ हजार रुपये किमतीचा मुद्देमाल चोरून नेला. हा प्रकार लक्षात आल्यानंतर त्यांनी जिल्हापेठ पोलिस ठाण्यात फिर्याद दिली. त्यावरून अज्ञात चोरट्याविरुद्ध गुन्हा दाखल करण्यात आला आहे. पुढील तपास पोहेकों वंदना चव्हाण करीत आहेत.
