लाईव्ह महाराष्ट्र न्यूज राजेंद्र पाटील शिवाजी नगरातील रहिवाशी रमेश राजन्न लोंकलकर (वय-४५) रा. शिवाजी नगर याचा रेल्वेच्या धक्क्याने जागीच मृत्यू झाल्याची घटना जळगाव शिरसोली दरम्यान शुक्रवारी 4 फेब्रुवारी रोजी सायंकाळी घडली. याप्रकरणी जळगाव तालुका पोलीसात अकस्मात मृत्यूची नोंद करण्यात आली आहे.
एमआयडीसी पोलिसांनी दिलेल्या माहितीनुसार रमेश लोंकलकर हे आपल्या कुटुंबीयांसह वास्तव्याला आहे. बळीराम पेठेतील वैभव रेडीमेड कापड दुकानात ते कामाला आहेत. शुक्रवार ४ फेब्रुवारी रोजी सकाळी साडेआठ वाजता कामावर जातो असे सांगून घरातून बाहेर पडले होते. दरम्यान दुपारी जळगाव शिरसोली रेल्वे मार्गावर मोहाडी गावानजीक शिरसोली रेल्वे डाऊन मार्गावर खांब क्र. ४११ (५-७) जवळ त्यांना रेल्वेचा धक्का लागल्याने जागीच मृत्यू झाल्याची घटना सायंकाळी उघडकीला आली. रेल्वे प्रबंधकांकडून खबर मिळाल्यानंतर तालुका पोलीस ठाण्याचे निरीक्षक रामकृष्ण कुंभार यांनी हवालदार अनिल फेगडे व हरीलाल पाटील यांना घटनास्थळी रवाना केले. खिशात आढळलेल्या कागदपत्रावर मुलाचा मोबाईल क्रमांक असल्याने मृताची ओळख पटली. पंचनामा करुन पोलिसांनी मृतदेह शासकीय रुग्णालयात आणला. लोंकलकर यांच्या पश्चात पत्नी राजश्री, मुलगा भैय्या (वय २०) व प्रसाद (वय १८) असा परिवार आहे. याप्रकरणी जळगाव तालुका पोलीस ठाण्यात अकस्मात मृत्यूची नोंद करण्यात आली आहे.
