जळगाव : प्रतिनिधी
दुकानावर चहा करीत असतानाच हृदयविकाराचा झटका आल्याने अरविंद अमाला पांडे (४९, मूळ रा. उत्तरप्रदेश, ह.मु. जळगाव) या चहा विक्रेत्याचा मृत्यू झाला. हृदयविकाराचा झटका आल्याने ते स्टोव्हवर पडल्याने त्यांच्या मानेजवळ भाजले गेले. ही घटना शुक्रवारी (११ ऑक्टोबर) ट्रान्सपोर्ट नगरजवळ घडली.
मिळालेल्या माहितीनुसार, उत्तर प्रदेशातील रहिवासी असलेले अरविंद पांडे हे सध्या जळगावात राहत होते. फिरत्या चहा दुकानावर ते व्यवसाय करीत होते. शुक्रवारी याच फिरत्या चहाच्या दुकानावर ते चहा करण्यासाठी दूध गरम करीत असताना त्यांना हृदयविकाराचा झटका आला त्यामुळे त्यांचा तोल जाऊन ते पेटत्या स्टोव्हवर पडले. त्यामुळे त्यांच्या मानेजवळ भाजले गेले. ही घटना लक्षात येताच त्यांना शासकीय वैद्यकीय महाविद्यालय व रुग्णालयात दाखल केले असता डॉक्टरांनी मयत घोषित केले. या प्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली आहे. पुढील तपास पोहेकॉ गफूर तडवी करीत आहेत
