जळगाव : प्रतिनिधी
महामार्गावर अपघातांची मालिका सुरूच असून, रविवारी (६ ऑक्टोबर) पुन्हा भरधाव चारचाकीने दुचाकीला धडक दिल्यामुळे दीपक कडू सूर्यवंशी (४५, रा. नशिराबाद) हे ठार झाले. हा अपघात रविवारी दुपारी नशिराबाद ते भुसावळ दरम्यान वैद्यकीय महाविद्यालयाजवळील उड्डाणपुलावर झाला. द्वारदर्शनाहून परतत असताना सूर्यवंशी यांच्यावर काळाने झडप घातली.
मिळालेल्या माहितीनुसार, नशिराबाद येथील दीपक सूर्यवंशी हे गावातीलच एका मेडिकलवर कामाला होते. त्यांच्या नातेवाइकांचे निधन झाल्याने ते सासऱ्यांसह ऐनपूर, ता. रावेर येथे द्वारदर्शनासाठी गेले होते तेथे सासऱ्यांना सोडून ते दुचाकीने (एमएच १९, एएम १६६६) घरी परतत असताना नशिराबादजवळ भरधाव चारचाकी वाहनाने धडक दिली. त्यात सूर्यवंशी यांच्या डोक्याला जबर मार लागून ते जागीच ठार झाले. मयताच्या पश्चात पत्नी तसेच सुकांक्षा व दिव्या या दोन मुली असून, या अपघाताने दोन्ही मुलींचे पितृछत्र हिरावले आहे. मनमिळाऊ स्वभाव व सर्वांशी आपुलकीने बोलणारे म्हणून दीपक हे परिचित होते.
