चोपडा शहर पोलीसात पाच जणांवर गुन्हा दाखल
चोपडा प्रतिनिधी । चोपडा शहरातील बसस्थानकाजवळ पाच जणांनी टॅक्सी अडवून चालकाला बेदम मारहाण करून खिश्यातील ६ हजार ३०० रुपये जबरी चोरून नेल्याचा प्रकार उघडकीला आलाय. चोपडा शहर पोलीस ठाण्यात गुन्हा दाखल करण्यात आला आहे.
चोपडा शहर पोलिसांनी दिलेल्या माहितीनुसार, हारुन शेख कमरुद्दोन शेख (वय-५२) रा. के.जी.एन कॉलनी, चोपडा हे टॅक्सी चालक आहे. टॅक्सी चालवून आपल्या कुटुंबाचा उदरनिर्वाह करतात. ३० जानेवारी रोजी रात्री १० वाजेच्या सुमारास ते चोपडा शहरातील बसस्थानकाकडून घरी जाण्यासाठी टॅक्सी क्रमांक (एमएच १९ वाय ०९२९)ने जात असताना त्यांना भैय्या पाटील, टाकल्या गवळी (पुर्ण नाव माहित नाही) आणि सोबत असलेले अनोळखी तीन जण असे एकूण ५ जणांनी कार आडवून त्यांना दमदाटी केली. तर इतरांनी लाकडी दांडक्याने मारहाण करून त्यांच्या खिशातील ६ हजार ३०० रूपयांची रोकड काढून चोरून नेले. याप्रकरणी टॅक्सीचालक हारून शेख यांनी चोपडा शहर पोलीस ठाण्यात धाव घेऊन तक्रार दिली. त्यांच्या तक्रारीवरून चोपडा शहर पोलीस ठाण्यात गुन्हा दाखल करण्यात आला आहे. पुढील तपास पोलीस निरीक्षक अवतारसिंग चव्हाण करीत आहे.
