जळगाव : प्रतिनिधी
पत्नी मुलांसह माहेरी गेलेली असताना घरी एकट्याच असलेल्या इरफान शेख सुलतान (२८, रा. तांबापुरा) यांनी घरात गळफास घेऊन आत्महत्या केली. शेजारी राहणारे वडील शुक्रवारी सकाळी इरफान यांना बोलविण्यासाठी गेले त्यावेळी ही घटना समोर आली. याप्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, बांधकामाच्या ठिकाणी टाईल्स फिनिशिंगचे काम करणारे इरफान शेख हे पत्नी व मुलांसह तांबापुरा परिसरात राहत होते. शेजारी त्यांचे आई-वडील देखील राहतात. तरुणाची पत्नी मुलांसह दोन दिवसांपासून माहेरी गेल्या होत्या. त्यामुळे ते घरी एकटेच होते. गुरुवारी रात्री त्यांनी राहत्या घरात गळफास घेतला. शुक्रवारी (१३ सप्टेंबर) सकाळी ८ वाजता त्यांचे वडील मुलाला कामावर जाण्यासाठी उठवायला गेले. त्यावेळी दरवाजा आतून बंद होता. इतरांच्या मदतीने त्यांनी दरवाजा उघडला असता मुलगा इरफान शेख यांनी गळफास घेतल्याचे दिसले.
