जळगाव प्रतिनिधी । शहरातील ममुराबाद रोडवर एका तरूणाचा संशयास्पदरित्या मृतदेह आढळला आहे. सदरील तरूण उस्मानियॉ पार्क येथील रहिवाशी असल्याचे समोर आले आहे. याप्रकरणी तालुकापोलीस ठाण्यात अकस्मात मृत्यूची नोंद करण्यात आली आहे.
शेख गफ्फार शेख जब्बार (वय-३५) रा. उस्मानियॉ पार्क असे मयताचे नाव आहे. यासंदर्भात अधिक माहिती अशी की, शेख गफ्फार हे बांधकामाचे सेंटींग काम करून कुटुंबियाचा उदरनिर्वाह करतात. आईवडील, पत्नी, भाऊ व दोन मुलांसह शहरातील उस्मानिया पार्क येथे वास्तव्याला आहे. बुधवारी २६ जानेवारी रोजी सायंकाळी काम आटोपून घरी निघाले होते. परंतू ते रात्री उशीरापर्यंत घरी न आल्याने नातेवाईकांनी त्याचा शोध घेतला असता कोठेही आढळून आले नाही. गुरूवारी २७ जानेवारी रोजी दुपारी १ वाजेच्या सुमारास ममुराबाद रोडवरील कोंबडी फार्मजवळ त्यांचा मृतदेह संशयास्पदरित्या आढळून आला. जळगाव तालुका पोलीस आणि नातेवाईकांनी धाव घेतली व मृतदेह जिल्हा शासकीय वैद्यकीय महाविद्यालयात आणण्यात आला. यावेळी जिल्हा रूग्णालयात नातेवाईक व मित्र परिवार यांनी मोठी गर्दी केली होती. याप्रकरणी पोलीस कर्मचारी पुढील चौकशी करत आहे. जळगाव तालुका पोलीस ठाण्यात नोंद करण्याचे काम सुरू होते.
