अमळनेर : प्रतिनिधी
तालुक्यातील एका गावातील अल्पवयीन मुलीला पळवून नेऊन संसार थाटणाऱ्या मांडळ येथील आरोपीला मारवड पोलिसांनी अटक केली आहे. आरोपीविरोधात मारवड पोलिसात पोस्को कायद्यानुसार गुन्हा दाखल करण्यात आला आहे. आरोपीला तीन दिवसांची पोलिस कोठडी सुनावण्यात आली आहे.
अल्पवयीन मुलगी बसने शिक्षणासाठी अमळनेर ये-जा करीत होती. तिची ओळख आरोपीसोबत झाली. त्यानंतर दि. १३ जून रोजी सकाळी ९ वाजता त्याने तिचे अपहरण केले. दोघेजण नागपूर आणि नंतर हैदराबाद येथे गेले. काही काळाने कोल्हापूर जिल्ह्यात नगाव येथे शेतीकाम करू लागले. अखेर पोलिसांनी त्यांना शिरोली, जि. कोल्हापूर येथील पोलिसांच्या मदतीने अटक केली. दोघांना मारवड येथे आणण्यात आले. मुलीच्या जबाबानुसार आरोपीविरोधात गुन्हा दाखल करण्यात आला आहे.
