चाळीसगाव : प्रतिनिधी
पोळ्याची सर्वत्र तयारी सुरू असतानाच ४८ वर्षीय शेतकऱ्याचा शेतातील विहिरीत पडल्याने बुडून मृत्यू झाल्याची घटना वाघडू येथे घडली. या घटनेने पोळ्याच्या सणावर दुःखाची छाया पसरली.
मिळालेल्या माहितीनुसार, वाघडू येथील शेतकरी साहेबराव भीमराव पाटील (४८) हे सोमवारी सायंकाळी ४ वाजेच्या सुमारास शेतात फेरफटका मारण्यास गेले असता त्यांचा शेतातील विहिरीत पडल्याने पाण्यात बुडून मृत्यू झाला. वडील घरी आले नाहीत, म्हणून मुलगा त्यांना पाहण्यास गेला असता हा प्रकार उघडकीस आला. या घटनेची माहिती मिळताच गावकऱ्यांनी शेताकडे धाव घेत साहेबराव पाटील यांचा मृतदेह विहिरीतून बाहेर काढून ग्रामीण रुग्णालयात नेला. याप्रकरणी बबनराव बाजीराव पाटील यांनी दिलेल्या खबरीवरून चाळीसगाव शहर पोलिस स्टेशनला अकस्मात मृत्यूची नोंद करण्यात आली आहे.
