जळगाव : प्रतिनिधी
थकीत कर्जाच्या रक्कमेच्या पाच टक्के रक्कम भरण्याची परवानगी देण्याच्या मोबदल्यात दीड लाख रुपयांची लाच घेणाऱ्या भाईचंद हिराचंद रायसोनी मल्टीस्टेट को- ऑपरेटिव्ह क्रेडीट सोसायटीचे अवसायक चैतन्य हरिभाऊ नासरे (वय ५७, रा. नागपूर) यांच्यासह वसुली अधिकारी सुनील गोपीचंद पाटील (वय ५४, रा. सुकृती पिनॅकल अपार्टमेंट) या दोघांना नाशिक येथील लाचलुचपत प्रतिबंधक विभागाच्या पथकाने मंगळवारी (दि.३) सायंकाळी, रंगेहाथ पकडले.
मिळालेल्या माहितीनुसार, तक्रारदाराने नाशिक लाचलुचपत प्रतिबंधक विभागाकडे याबाबत तक्रार केली. पथकाने मंगळवारी सायंकाळी सापळा रचला आणि वसुली अधिकारी सुनील पाटील याला लाचेची रक्कम स्विकारतांना रंगेहाथ पकडले. याप्रकरणी त्यांच्याविरुद्ध एमआयडीसी पोलिसात रात्री उशिरा गुन्हा दाखल करण्यात आला आहे. कारवाई नाशिक लाचलुचपत प्रतिबंधक विभागाचे पोलीस निरीक्षक संदीप घुगे, अमोल वालझाडे, पोहेकॉ प्रभाकर गवळी, पोना गणेश निंबाळकर, नितीन नेटारे, सुरेश चव्हाण, संतोष गांगुर्डे यांच्या पथकाने केली आहे.
