नंदूरबार : वृत्तसंस्था
राज्यातील अनेक ठिकाणी अल्पवयीन मुलीसह विवाहितेवर विनयभंग व अत्याचाराच्या घटना घडत असतांना नुकतेच खान्देशातील नंदूरबार शहरात एका १४ वर्षीय मुलीचा दोन वेळा विनयभंग करत तिची छळवणूक करण्याचा प्रकार समोर आला आहे. याप्रकरणी मुलीने आई-वडिलांसह उपनगर पोलिसात फिर्याद दिल्यानंतर संशयिताविरोधात गुन्हा दाखल करून अटक करण्यात आली आहे. कैलास काशीराम मोरे (४३) असे मुलीचा विनयभंग करणाऱ्या संशयिताचे नाव आहे.
मिळालेल्या माहितीनुसार, १ ऑगस्ट रोजी १४ वर्षीय मुलगी घरी एकटी असताना कैलास याने तिला अश्लील हावभाव करत ‘मला घरात येऊ दे’ असे सांगितले होते. घाबरलेल्या मुलीने ही बाब शेजारी असलेल्या महिलेला सांगितल्यानंतर त्यांनी तिला धीर देत घराचा दरवाजा बंद ठेवण्यास सांगितले. मुलीचे पालक घरी आल्यानंतर त्यांनी याबाबत संशयित कैलास मोरे याला जाब विचारल्यानंतर त्याने विळा घेऊन धक्काबुक्की केली होती. याप्रकरणी १४ वर्षीय पीडित मुलीने उपनगर पोलिस ठाण्यात दिलेल्या फिर्यादीवरून संशयित कैलास काशीराम मोरे (४३) याच्याविरोधात विनयभंग आणि पोक्सो कायदा-कलमांतर्गत गुन्हा दाखल करण्यात आला आहे. तपास पोलीस उपनिरीक्षक अमोल देशमुख करत आहेत. संशयितास पोलिसांकडून रविवारी रात्री ११.३५ वाजता अटक करण्यात आली. सोमवारी दुपारी न्यायालयात हजर करण्यात आले होते. उशिरापर्यंत न्यायालयात कामकाज सुरू होते.
