नंदूरबार : वृत्तसंस्था
राज्यातील अनेक शहरात अत्याचाराच्या घटना ताज्या असतांना नुकतेच शहादा तालुक्यातील प्रकाशा येथे नराधम बापानेच नात्याला काळिमा फासत आपल्याच अल्पवयीन मुलीवर अत्याचार करून तिला गर्भवती केल्याची संतापजनक घटना तालुक्यातील एका गावात उघडकीस आली आहे.
मिळालेल्या माहितीनुसार, याबाबत मुलीच्या आईनेच शहादा पोलिसात शनिवारी दुपारी फिर्याद दिली. त्यावरून अत्याचारी बापाविरुद्ध बलात्काराचा आणि पोक्सो अंतर्गत गुन्हा दाखल झाला असून, त्याला अटक करण्यात आली आहे. फिर्यादीनुसार, या १३ वर्षीय मुलीवर तिच्याच बापाने एप्रिल व जुलै महिन्यात वेळोवेळी अत्याचार केले.
घरात कुणी नसल्याची संधी साधत तो तिच्यावर अत्याचार करीत होता. कुणाला काही सांगितल्यास ठार मारण्याची धमकीही दिली. या अत्याचारातून बालिका गरोदर राहिली. ही बाब आईला समजल्यावर तिने मुलीला विश्वासात घेऊन विचारणा केली असता, ती हादरलीच, भारतीय दंड विधान कलम ३७६, ३७६ (२), (एफ) (एन), ५०६ व पॉक्सोअंतर्गत गुन्हा दाखल करण्यात आला आहे.
