जळगाव : प्रतिनिधी
गरोदर असलेल्या पत्नीला गर्भ पाडावा यासाठी जबरदस्ती करून, पत्नीला जबर मारहाण केल्याची घटना शहरातील पिंप्राळा हुडको भागात उघडकीस आली आहे. याप्रकरणी पत्नीच्या फिर्यादीवरून पतीसह आणखी एका महिलेविरुद्ध रामानंदनगर पोलिस ठाण्यात शुक्रवारी गुन्हा दाखल करण्यात आला आहे.
फिर्यादीत दिलेल्या माहितीनुसार नंदिनी राहुल सावळे (वय २९, रा. पिंप्राळा हुडको) या आपल्या कुटुंबासह वास्तव्याला आहेत. त्या गरोदर आहेत. मात्र त्यांचा गर्भ पाडण्यात यावा, यासाठी पती राहुल पुंडलिक सावळे (वय ३३) याने शुक्रवारी पहाटे ३ वाजेच्या सुमारास पत्नी नंदिनी सावळे यांना चापटा बुक्क्यांनी मारहाण केली. तसेच पोटावर मारहाण केली. या प्रकरणी नंदिनी सावळे यांनी शुक्रवारी दुपारी रामानंदनगर पोलिस स्टेशनमध्ये जाऊन, पती राहुल सावळे व पार्वती मोहन सावंत यांच्याविरुद्ध गुन्हा दाखल केला आहे.
