जळगाव : प्रतिनिधी
शहरातील भास्कर मार्केटसमोरील एका हॉटेलमध्ये दारु पित असलेल्या भूषण रघुनाथ सपकाळे (रा. खेडी. बु. ता. जळगाव) याने गोळीबार केल्याची घटना मंगळवारी घडली होती. याप्रकरणी त्याच्यासह आठ जणांविरुद्ध जिल्हापेठ पोलिसात गुन्हा दाखल झाला आहे. गोळीबार करणारा भूषण सपकाळे याला दोन वर्षांसाठी हद्दपार करण्यात आले असून हद्दपार असतांना देखील त्याने जळगावात येऊन गोळीबार केल्याचे पोलिसांच्या तपासात उघड झाले आहे.
मिळालेल्या माहितीनुसार, शहरातील भास्कर मार्केटसमोरील हॉटेल शालीमार येथे रविवारी सायंकाळी हद्दपारीची कारवाई झालेला भूषण सपकाळे व मयुर सोनार यांच्यासह सात ते आठ जण दारु पिण्यासाठी आले. दारु पित असतांना अचानक त्या टोळक्यातील एकाने त्याच्याजवळील पिस्तुल काढून जमिनीवर गोळीबार केला. यावेळी भूषण सपकाळे याने जोरजोरात ओरडून मला भूषण सपकाळे म्हणतात, मी राऊंड फायर केला असे कुणाला सांगितले तर मर्डर करुन टाकेल अशी धमकी दिली. त्यानंतर त्याच्यासोबत असलेल्यांनी हॉटेलचे बील भरुन पळ काढला होता. गोळीबाराची घटना उघडकीस आल्यानंतर एलसीबीच्या पथकाने तपासचक्रे फिरवित संशयीत भूषण सपकाळे याला रात्री अटक केली. मात्र त्याच्याजवळ असलेले पिस्तुल मात्र मिळून आले नाही. त्याच्यासोबत असलेल्या साथीदारांचा पोलिसांकडून शोध घेतला जात आहे.
