जळगाव : प्रतिनिधी
नातेवाइकांना मुलगा झाल्याने त्यास रुग्णालयात पाहण्यासाठी जाताना दुचाकीला ट्रकने मागून धडक दिली. यात १७ वर्षीय तरुणीसह महिलेचा जागीच मृत्यू झाला तर २ वर्षांचा चिमुरडा गंभीर जखमी झाला आहे. ही घटना बुधवारी दुपारी १ वाजून ५० मिनिटांनी गुजराल पेट्रोलपंप ते मानराज चौक दरम्यान राष्ट्रीय महामार्गावर घडली.
मिळालेल्या माहितीनुसार, दिक्षिता राहुल पाटील (वय २७, रा. नाशिक), पायल (खुशी) देवेंद्र जलंकर (१७ रा. वाटिकाश्रम, जळगाव) असे मयत महिला व तरुणीचे नाव आहे तर रुद्र राहुल पाटील (वय २) हा गंभीर जखमी झाला आहे. दिक्षिता यांचे वडील अर्जुन पाटील हे शहरातील वाटिकाश्रम येथील व्दारकाई अपार्टमेंट येथे वास्तव्यास आहेत. तर पायलदेखील आपल्या आई-वडिलांसह त्याच अपार्टमेंटला राहत होती. त्यांच्या शेजारीच राहणाऱ्या नातेवाइकाला मुलगा झाला म्हणून, त्या मुलाला पाहण्यासाठी या दोघी सोबत जात होत्या. त्यावेळी खोटेनगर स्टॉपजवळील पुलावर खड्डा चुकविताना त्यांची दुचाकी ट्रॅक्टर व ट्रकच्या मधोमध अडकली. त्यातच दुचाकीला ट्रकची धडक बसल्याने त्या पडून ट्रकखाली चिरडल्या गेल्या. त्यातच दोघींचा जागीच मृत्यू झाला. तर २ वर्षांचा रुद्र गंभीर जखमी झाला. त्याच्यावर खासगी दवाखान्यात उपचार सुरू आहेत. दरम्यान, या अपघातानंतर ट्रकचालक पसार झाला
