जळगाव : प्रतिनिधी
जिल्ह्यातील अनेक ठिकाणी अपघाताच्या मालिका घडत असतांना नुकतेच पाचोरा तालुक्यातील म्हसावद-नांद्रा रस्त्यादरम्यान माहिजी गावाजवळ स्लॅब टाकण्याच्या मिक्सर मशीनचा दोर तुटल्याने दुचाकीवर बसलेल्या मामा-भाचा जखमी झाले आहेत. या दोघांच्या पायाला जखम झाली आहे. त्यांना नांद्रा प्राथमिक आरोग्य केंद्रात प्रथमोपचार करून जळगावच्या खासगी दवाखान्यात हलवण्यात आले आहे.
मिळालेल्या माहितीनुसार, म्हसावद येथील मिक्सर मशीन (एमएच १९ सीवाय ९०३२) या टेम्पो गाडीला मागे दोर बांधून नांद्राकडे जात असताना माहिजी गावाच्या पुढे लासगाव येथील नाना गणसिंग पाटील (६५) व भाचा नारायण साहेबराव पाटील (३५, खोकरपाट) हे दुचाकीवरून चालले होते. मंगळवारी सकाळी ९ वाजेदरम्यान लासगाव (ता. पाचोरा) येथून अंतुली (ता. एरंडोल) येथे गंधमुक्तीच्या कार्यक्रमासाठी जात होते. माहिजी गावाजवळ समोरून येणाऱ्या टेम्पोला टोचन करत असताना स्लॅब मिक्सर मशीनचा दोर तुटल्याने मशीन हे दुचाकीवर आदळले. या दोघांच्या पायाला जबर दुखापत झाली आहे. तपास पोनि अशोक पवार यांच्या मार्गदर्शनाखाली पोकॉ भगवान बडगुजर करीत आहेत.
