जळगाव : प्रतिनिधी
जळगाव शहरासह चोपडा, अमळनेर, चाळीसगाव, भडगाव येथे मंगळवारी विजांच्या कडकडाटासह पाऊस झाला. गुरे चारताना वीज कोसळून शिरसोलीतील शेतकऱ्याचा मृत्यू झाला. धुळ्यातही सोमवारनंतर मंगळवारी सलग दुस-या दिवशी पावसाने हजेरी लावली. नंदुरबार येथे मंगळवारी जोरदार पाऊस झाला.
धरणाजवळ गुरे चारत असताना वीज कोसळल्याने त्र्यंबक ओंकार अस्वार (बारी) (७१, रा. शिरसोली प्र.न.) हे जागीच ठार झाले. या सोबतच तेथे एक म्हैसही दगावली. ही घटना तालुक्यातील शिरसोली शिवारातील नायगाव धरणाजवळ मंगळवारी दुपारी अडीच ते पावणे तीन वाजेदरम्यान घडली. त्र्यंबक अस्वार हे मंगळवारी नायगाव धरणाजवळ गुरे चारण्यासाठी गेले होते. त्यावेळी विजांच्या कडकडाटासह पाऊस सुरू झाला व अस्वार यांच्या अंगावर वीज कोसळली. त्यात त्यांचा जागीच मृत्यू झाला. या सोबतच त्यांच्या शेजारीच असलेली एक म्हैस ही दगावली.
जळगाव जिल्ह्याला मंगळवारी मुसळधार पावसाने झोडपून काढले. या पावसाचा कापूस पिकाला फटका बसण्याची शक्यता आहे. जिल्ह्यात चोपडा, अमळनेर, चाळीसगाव, भडगाव परिसरात दुपारी ढगांच्या गडगडाटासह जोरदार पाऊस झाला. शेंदुर्णी येथेही काही भागात तुरळक पाऊस झाला.
