धरणगाव प्रतिनिधी । शहरातील गजानन पार्क येथे बनावट देशी दारू कारखान्यावर राज्य उत्पादन शुक्ल विभागाने धडक कारवाई करत चार जणांना अटक केली आहे. त्यांच्याकडून सुमारे ११ लाख रूपये किंमतीचा मुद्देमाल जप्त करण्यात आला आहे.
सुत्रांकडून मिळालेल्या माहितीनुसाार, धरणगाव शहरातील गजानन पार्क परिसरात बनावट दारू तयार करून विक्री होत असल्याची गोपनिय माहिती राज्य उत्पादन शुल्क विभागाला शनिवारी २२ जानेवारी रोजी दुपारी मिळाली होती. त्यानुसार राज्य उत्पादक शुल्क विभागाचे जिल्हा अधिक्षक सीमा झावरे यांच्यासह निरीक्षक सी. एच. पाटील, दुय्यम निरीक्षक ए. एस. पाटील, एस. एफ. ठेंगडे, जवान एन. व्हि. पाटील, ए. व्ही. गावंडे, एम. डी. पाटील, के. पी. सोनवणे, राहुल सोनवणे यांनी भास्कर पांडुरंग मराठे याचे साई गजानन पार्क येथील राहत्या घरावर छापा टाकला. याठिकाणी सुमारे ११ लाख रूपये किंमतीचा दारूचा साठा जप्त करण्यात आला.
या कारवाईत संशयित आरोप गौतप नरेंद्र माळी (वय-३२) रा. थवा, ता. नेत्रंग, जि. भरुच, (गुजरात) ह.मु. साईगजानन पार्क, धरणगाव, ता. धरणगाव, जि. जळगाव,भुपेंद्र गोकुळ पाटील, वय २९ वर्षे, रा. मराठे गल्ली, धरणगाव, कडु राजाराम मराठे, वय ४० वर्षे, रा. मराठे गल्ली, धरणगाव आणि भास्कर पांडुरंग मराठे, वय ६३ वर्षे, रा. साई गजानन पार्क, धरणगाव या चौघांना अटक केली आहे.
लाखोंचा मुद्देमाल जप्त
बनावट देशीमदय तयार करण्याकरीता लागणारे साहीत्य स्पीरीट, बनावट देशी दारु टँगो पंचच्या १८० मिली च्या सिलबंद बाटल्याचे ११७ बॉक्स (५६१६ बाटल्या), बनावट देशी दारु टँगो पंचच्या ९० मिली च्या सिलबंद बाटल्यांचे ८६ बॉक्स (८६०० बाटल्या), देशीमदयाचा तयार ब्लेंड, ४ सिलींग मशिन, १ ब्लेंडिंग मशिन, बुचे, रिकाम्या बाटल्या, खोके, कागदी लेबल तसेच दोन दुचाकी असा एकुण ११ लाख २ हजार ४०० रूपये किंमतीचा दारूचा साठा व मुद्देमाल जप्त केला आहे.
