भडगाव : प्रतिनिधी
तालुक्यातील खेडगाव येथे शेतात फवारणी करण्यासाठी गेलेल्या दोन बहिणींच्या भावाचा रक्षाबंधनाच्या दिवशीच सकाळी ९ वा. विहिरीत पडून मृत्यू झाला. अभिजित भास्कर पाटोळे (२६) असे या तरुणाचे नाव आहे. तब्बल दोन तासांनी त्याचा मृतदेह बाहेर काढण्यात आला. या दुर्देवी घटनेमुळे गावात रक्षाबंधन साजरे झाले नाही.
मिळालेल्या माहितीनुसार, दोन बहिणी घरी रक्षाबंधनासाठी आलेल्या असताना भद्रा काळ दुपारी १ वाजून ३२ मिनिटांपर्यंत आहे. तोवर रोजंदारीने कपाशीवर कीटकनाशक फवारणी करून येतो म्हणून अभिजित हा शेतावर गेला. त्याचवेळी स्प्रेपंपासोबत त्याचा विहिरीत तोल गेला. सोबतचे मजूर मदतीसाठी धाव घेत नाही तोवरच पंप भरलेला असल्याने त्याच्या वजनामुळे तो विहिरीच्या तळाशी गेला. यानंतर अभिजीतचा मृतदेहचा हाती लागला. राखी बांधून घेण्याआधीच भावा- बहिणीच्या नात्याचा धागा निखळला म्हणून दोघा बहिणींनी टाहो फोडला. त्यांची शुद्ध हरपली. रक्षाबंधनासाठी आदल्या दिवशीच त्याने बहिणींसाठी पेढे आणले होते.
